Baie geluk! Jy het jou oë toegeknyp en die groot stap na jou eie onderneming gegee, maar is jou korttermynversekering in orde, vra Pieter Willem Moolman.

Voordat die warrelwind van werk jou opsuig, moet jy voorberei vir moontlike risiko’s soos brande, diefstal en vloedskade en hiervoor is goeie korttermyndekking noodsaaklik.

Moenie hier die belangrikheid van ’n goeie makelaar onderskat nie. Kry iemand wat jy vertrou met ondervinding in besigheidsversekering.

Onthou dat jou vereistes van ander kliënte s’n verskil en dus moet jou makelaar ’n nommerpas-pakket vir jou behoeftes saamstel.

Maak doodseker jy kry die beste premie en die beste diens. Jou premie is moontlik mededingend, maar is die dekking voldoende?

Gaan versigtig te werk wanneer jy ’n versekeraar kies en ondersoek die eisproses om vas te stel hoe maklik jy ’n eis kan registreer en hoe stiptelik die geld uitbetaal word. Jou onderneming se vermoë om skielike verliese te hanteer, kan jou ondergang of sukses beteken.

Onthou om jou polis te hersien. Sodra jou versekeringsake in orde is, is dit só maklik om daarvan te vergeet.

Hou egter in gedagte dat die omstandighede van jou onderneming onderhewig is aan sekere veranderinge en dus ook jou versekeringsbehoeftes. Hersien jou polis minstens een keer per jaar – of meer gereeld as jou onderneming voortdurende verandering ondergaan.

Dit dien geen doel om ’n premie te betaal as die versekerde bedrag nie die werklike waarde van jou besittings weerspieël nie.

Veranderende omstandighede kan jou premie beïnvloed. As jy byvoorbeeld jou perseel beter beveilig, kan dit jou premie verlaag.

Daar is ’n aantal faktore wat ’n rol speel in die berekening daarvan. Die beginsel is eenvoudig – hoe hoër die risiko, hoe hoër jou premie.

Die volgende risiko-faktore moet voortdurend in ag geneem word:

Versekeraars vereis dat jy die nodige stappe moet neem ten einde moontlike skade of verlies te voorkom deur sekere sekuriteitsmaatreëls aan jou gebou of besigheidsvoertuig aan te bring.

Hierdie maatreëls kan enigiets insluit van diefwering, alarmstelsels, elektriese heinings en sekuriteitshekke tot ’n opsporingstoestel in ’n voertuig.

Dit is egter belangrik om te onthou dat, sodra die versekeraar in kennis gestel is dat sekuriteitsmaatreëls soos hierdie aangebring is, dit in stand gehou moet word ten einde teleurstelling in geval van ’n eis te voorkom.

Waar die versekeraar byvoorbeeld onder die indruk verkeer dat daar ’n gekoppelde alarm geïnstalleer is, maar dit nie oornag geaktiveer is nie, kan probleme ontstaan.

Die nodige brandvoorkomingsmaatreëls moet getref word afhangende van watter tipe besigheid jy bedryf. Prokureurskantore hou uiteraard nie ’n brandgevaar in nie, maar ’n waterbesproeiingstelsel kan geïnstalleer word om te verhoed dat belangrike dokumentasie in ’n brand vernietig raak.

Vulstasies aan die ander hand hou ’n noemenswaardige brandgevaar in en kan verskeie brandvoorkomingsmaatreëls soos byvoorbeeld sigbare “rook verbode”-tekens, brandslange en brandblussers aangebring word.

Besighede met vlambare produkte soos verf kan brandbestande kamers hê waarin vlambare produkte gestoor word.

Jou eisegeskiedenis is nog ’n groot faktor by premieberekening. Versekeraars kyk gewoonlik na die afgelope drie jaar.

Pieter Willem Moolman is die stigter van PWM Financial Management in Port Elizabeth. Besoek www.pwmfb.co.za of skakel 041 582 3034.